تقريبا مافيش مريض الم مزمن حاليا غير و بيتعرض عليه التردد الحراري كوسيله علاج و كتير من المرضي بيبقوا مش فاهمين ايه القصه و يتوقعوا ايه
اولا لازم نفهم ايه هو التردد الحراري و ايه الدواعي الطبيه لاستخدامه علشان نقدر ناخد قرار نقبل ايه في علاجنا
-دائما ببسط الصوره للمرضي بتوعي اننا في التردد الحراري بنستخدم تردد معين للطاقه شبه الميكروييف اللي بنستخدمه في البيت عن طريق ابر بتتحط قريب من المنطقه اللي عاوزين نعالجها و الطاقه دي بتولد درجه معينه من الحراره اما في صوره نبضيه pulsed radiofrequency و ده بيكون عند ٤٢ درجه يعني قريب من درجه حراره الجسم و ده لمًا بنكون عاوزين نحافظ علي العصب سليم لانه ماينفعش نبخره زي مثلا عصب مختلط بيشيل حركه و احساس من مكان ما و هنا التردد الحراري وظيفته انه يعدل من طريقه شغل العصب لكنه بيحافظ عليه سليم و ده ليه دواعي طبيه من اشيعها مثلا مرضي عرق النسا( و ان كانت التسميه مش صحيحه) لما بيكون عندهم الم اعصاب في الساق بسبب تهيج عصب نتيجه الضغط عليه في منطقه الضهر و بيتم حقن العصب ده كبدايه باستخدام المسكن الموضعي و الكورتيزون بشكل علاجي و تشخيصي بمعني علاج للالم و في نفس الوقت التاكد من مصدر الالم. لو اثر الحقن كان ايجابي لكن ماستمرش مده كافيه بيكون مقبول جدا تجربه التردد الحراري النبضي لاطاله اثر الحقن
-فيه نوع تاني من التردد الحراري و هو التردد الحراري المعتاد Conventional Radiofrequency و هنا احنا بنوصل لدرجه حراره ٨٠ درجه يعني اكتر من ضعف درجه حراره الجسم فبديهيا احنا بنحرق العصب اللي مسبب مشكله و فيه دواعي طبيه متعدده للاجراء ده..مثلا مرضي الام اسفل الظهر الناشئه من المفاصل الصغيره بين الفقرات Facet joints
هنا احنا اولا بنخدر العصب المغذي للمفصل بشكل تشخيصي باستخدام مخدر موضعي فقط و بنطلب من المريض يحتفظ بيوميات للالم بتاعه علي مدار الايام الاولي بعد الحقن و بننصحه انه يمارس روتين حياته طبيعي و لو حقق ٥٠٪ علي الاقل او اكتر تحسن في الم الظهر علي مدار الايام الاولي بنعتبر ده علاج ناجح و بيتبعه عمل تردد حراري معتاد علي العصب اللي خدرناه قبل كده و ده بيدي مده طويله للتعافي من الالم قد تصل الي سنه او اكتر خصوصا في مريض بيتبع الاجراء ده ببرنامج تاهيل تحت اشراف العلاج الطبيعي و تفكير ايجابي مركز علي جوده الحياه و الحاله الوظيفيه
-طبعا فيه دواعي تانيه للتردد الحراري التقليدي زي الام مفاصل الفخذ و الركبه و الكتف و المفصل العجزي الحرقفي اسفل الظهر و غيرها و كلها بتتبع نفس المبدأ..الحقن التشخيصي اولا ثم التردد الحراري في حاله نجاح العلاج التشخيصي
-فيه اسئله شائعه للمرضي زي هل ممكن اكرر التردد الحراري في المستقبل و الاجابه ايوه و ان كان التكرار ممكن يكون اقل فاعليه لاننا مش بنكون عارفين الاعصاب دي نمت تاني في اي صوره و مكان ..السؤال التاني هل ممكن اعمل عمليه تغيير مفصل بعد التردد الحراري و الاجابه برضه ايوه بل انك لو اتحسن الالم عندك قبل الجراحه و قدرت تعمل برنامج تاهيل ده بيخليك تدخل الجراحه في صوره ممتازه و بيسرع من تعافيك بعد الجراحه
-هنا همسه في اذن المرضي…. ماتقبلش تردد حراري من غير حقن تشخيصي اولا …ممكن يكون الكلام مش منطقي و تقول ليه اتحقن مرتين و ادفع مرتين لما ممكن اتحقن مره و الاجابه ان ده لمصلحتك لان الالم عموما عرض معقد صعب تجزم بمصدره بيقين كامل من غير حقن تشخيصي اولا فلو حضرتك عملت تردد حراري مباشره نسبه الفشل بتكون عاليه و الاهم ان دي توصيه تقريبا كل الجهات العلميه المحترمه اللي بتعطي توصيات حول العلاج التدخلي للالم
